Sept. 7, 2007

ang sining ng tunay na laman

O di kaya, “Karnalan”

Paunang salita: Minsan isang bangag na gabi sa aking ultimate bachelorette pad a.k.a. kwartong maliit, napunta ang usapan sa pagsusulat ko sa Tagalog.

“Wala akong kwentang magsulat sa Tagalog,” sabi ko.

“Sayang no, August pala ang Linggo ng Wika. Maganda sanang isulat sa Tagalog yung tungkol sa Tunay na Laman.”

“Tunay na laman!”

“Oo di ba, ang Sining ng Tunay na Laman!”

“Sabaw!”

“Kunyari na lang pang-Linggo ng Wika, na-late lang!”

“Ano ba, sabihin ko na lang, Linggo ng Aking Wika, e di solb.”

Ayun. Para sa Linggo ng Aking Wika, aking itina-champook (inside joke) ang Sining ng Tunay na Laman.

(puwang para sa mga tambol dito, pakiusap)

Maaaring ma-trace ang simula ng usapan ukol sa Tunay na Laman sa isa pang sabaw na gabi sa aking ultimate bachelorette pad a.k.a. maliit na kwarto, may ilang Biyernes/Sabado ng umaga na rin ang nakakaraan, kung kailan nagtanong ang isang kaibigan tungkol sa pagkakaroon ng isang mahaba-habang relasyon (ano pa nga ba ang pag-uusapan ng dalawang babaeng naghihintay ng antok habang katabi ang kaibigang magjowa sa kamang tama lang dapat sa dalawang tao di ba).

Napag-uusapan na rin lang ang katotohanan tungkol sa mga relasyon na yan, eto ang tanong naming mga single nung gabing yun: Kung isa pa lang ang naging karelasyon mo ever at matagal na kayo at mukhang sa kasal na ang tuloy ng lahat, hindi ba parang nakakahinayang na hindi ka nakatikim ng “ibang laman”?

Oo, sa madaling salita, ito na naman ang walang kamatayang tanong ukol sa “playing the field before settling down” na matatawag sa Ingles.

Kasi ganito yan, sabi namin sa isa’t-isa – sa sobrang sabaw di ko na mapagtanto kung alin ang sinabi niya at alin ang mga sinabi ko – merong Ibang Laman at merong Tunay na Laman. Samakatwid, kung ang kasama mo na ay ang Tunay na Laman, at sobrang maligaya ka na dito sa Laman na Meron Ka, masasabi bang masama kang karelasyon kung minsan iniisip mo pa rin ang “what-if” na ukol sa Ibang Laman?

Sabi namin baka hindi naman ganun, na normal naman siguro ang isipin mo ang mga bagay-bagay na Maaaring Nangyari Yun Nga Lang Hindi (sa Ingles, the What-could-have-beens) pero napagtanto din namin na hindi rin worth it ang mawala sa iyo ang Tunay na Laman sa pagnanais mong makatikim ng Ibang Laman. Tunay na Laman na yun eh, pakakawalan mo pa ba?

At siyempre, dahil ako si Bb Long-Term, ang boto ko ay para sa Tunay na Laman (na siyempre, dapat ituring ka ring Tunay na Laman niya), na isang Pangmatagalang Sagot sa isang Pangmatagalang Gutom – kung ikukumpara naman sa mga Pansamantalang Sagot sa mga Pansamantalang Gutom di ba.

Sa puntong ito, aking na-realize na isa talaga akong ganap na culinary reductionist – lahat na lang ng bagay, sa pagkain ang tuloy, kahit mga metapora.

(sa maniwala kayo at sa hindi, seryoso ang usapang ito.)

*

“Dapat talaga hinihintay ang Tunay na Laman.”

“Oo, Tunay na yun eh.”

“Dapat hindi na pinag-aaksayahan ng panahon yung mga Hindi Tunay na Ibang Laman.”

“Hindi naman, kailangan din makakilala ng Ibang Laman para makilala si Tunay na Laman, tama?”

“Ay oo nga.”

“Yun nga lang, kailangang siyasating mabuti ang mga Laman na Kinikilala natin.”

“Oo, dapat siguraduhing ligtas.”

“At tunay.”

“Oo nga.”

*

Ang bahaging ito ay hatid sa inyo ng Vetracin Soluble at ng National Meat Inspectors Commission na nag-iiwan ng paalalang ito: Siguraduhing may seal ang mga Laman na Inuuwi.

Amen.